??آهسته گل آهسته گئت??

کؤنلوم یارادیر سئوگیلیم آهسته گل آهسته گئت

جیسمیم غم ایله باغلی دیر آهسته گل آهسته گئت

آیلاردی قلبیم خسته دیر زنجیر عشقه  بسته دیر

کؤنلوم سنه وابسته دیر آهسته گل آهسته گئت

عشق آتشی بریان ائدیب غم کونلومو ویران ائدیب

هجرین منی  گیریان ائدیب آهسته گل آهسته گئت

سنسیز یازیم قیش دیر منه  دونیا بوتون هئشدیر منه

باغریم یانیر سؤنمز حله آهسته گل آهسته گئت

سن سن منیم دان اولدوزوم عشقیم سازیم یازقیم سؤزوم

سن سئوگی یه قوربان اؤزوم  آهسته گل آهسته گئت

چوخ داندی سندن آیری یام  گول چؤهره یین حیرانی یام 

اؤز دردیمین گیریانی یام آهسته گل آهسته گئت

اولدو  پریشان  احوالیم یوخدور بو جیسمیمده حالیم

الدن گئدیر جیسمیم  جانیم  آهسته گل آهسته گئت

شوری له  قلبیم ایزله ییر حسرتله  گؤزلر گؤزله ییر

کؤنلومده هر آن اؤزله ییر آهسته گل آهسته گئت

گونلر  گئچیر  قاشماق دادیر  یاش  ایله نیب  آخماقدادیر

عؤمروم  ده  قورتولماقدا دیر آهسته گل آهسته گئت

تورپاق  قالانسا اوستومه کؤنلوم  دولودور حوسنونه

گلسن ده قبریم  اوستونه آهسته گل آهسته گئت